Dagskrá haust 2020

Dagskrá haust 2020

Fyrsti viðburðurinn í starfi Rótarinnar haustið 2020 er námskeiðið Forvarnir fyrir grunnskóla sem haldið er 2. september. Í haust verða haldin nokkur námskeið á vegum félagsins, Rótarhópurinn hefur göngu sína 16. september og þá býður félagið upp á fjölbreytta fræðslu meðal annars fyrir ráðgjafa og dvalarkonur Kvennaathvarfsins.

Athugið að félagið fylgir sóttvarnareglum vegna Covid-19 og því komast færri að á námskeið og hópa.

Vegna Covid-19 er nú gert hlé á umræðukvöldum félagsins í haust og eins er um Hreyfiaflið.

(more…)

Námskeið fyrir fagfólk sem þjónustar konur

Námskeið fyrir fagfólk sem þjónustar konur

Rótin heldur námskeið fyrir fagfólk sem þjónustar konur sem glíma við áföll og neysluvanda og er markmiðið þess að kynna þá aðferðafræði sem Rótin fylgir fyrir fagfólki sem hefur áhuga á nýrri nálgun í þjónustu við konur með áfallasögu og/eða vímuefnavanda. Á námskeiðinu er stuðst við áfalla- og kynjamiðaða gagnreynda þekkingu.

Drög að dagskrá

  • Rótin. Tilurð félagsins og hugmyndafræðin. Skipulag og starfsemi. Leiðarljós og reglur fyrir námskeið og hópastarf
  • Kenningar um skaðlega vímuefnanotkun. Sjúkdómskenningin. Einstaklingurinn í forgrunni og aðrar nýjar kenningar
  • Vald og ofbeldi
  • Þróun áfalla. Meðal annars skoðað m.t.t. kynja
  • ACE-rannsóknin og aðrar rannsóknir um tengsl áfalla við alvarlega sjúkdóma
  • Skaðaminnkun
  • Áfallamiðuð starfsemi
  • Valdefling kvenna. Seigla og styrkleikar. Spurt er: „Hvað kom fyrir þig?“ en ekki „Hvað er að þér?“
  • Konur finna styrk sinn. Námskeið og hópar Rótarinnar kynnt ítarlega
  • Helstu sóknarfærin á þessu sviði ekki síst á tímum COVID-19

Skipulag

Verð

  • 43.900 kr.

Leiðbeinendur og verkefnisstjórn

  • Leiðbeinendur eru Guðrún Ebba Ólafsdóttir, Katrín G. Alfreðsdóttir og Kristín I. Pálsdóttir. Sjá nánar.
Konur finna styrk sinn – Námskeið

Konur finna styrk sinn – Námskeið

Námskeiðið Konur finna styrk sinn (e. Helping women recover) er leiðsagnarhópur fyrir konur þar sem lögð er áhersla á að vinna með rætur áfengis- og vímuefnavanda og annað andstreymi í lífi kvenna. Unnið er út frá því að vímuefnanotkun sé ekki einangrað vandamál heldur eigi sér m.a. rætur í áföllum. Tekið er á þeim fjölþætta vanda sem konur með sögu um vímuefnavanda glíma við. Unnið er með efni úr smiðju dr. Stephanie Covington sem er frumkvöðull í vinnu með vímuefnavanda kvenna með áfallasögu. Á milli tíma er verkefnavinna sem þátttakendur eru hvattar til að vinna svo að þær fái sem mest út úr námskeiðinu og fá þátttakendur veglega vinnubók.

Fyrir hverjar

Námskeiðið er ætlað konum sem eiga sögu um vímuefnavanda. Það hentar jafnt konum sem hafa ekki notað vímuefni í langan tíma sem og konum sem eru að hefja vinnu við að bæta lífsgæði sín. Hámarksfjöldi er venjulega 10 þátttakendur en vegna sóttvarnaráðstafana eru nú einungis sex pláss í boði.

Markmið

Markmið námskeiðsins er að konur öðlist aukna sjálfsþekkingu sem einstaklingar en skilgreini sig ekki í gegnum sambönd eða stöðu sína. Einnig að þær átti sig á styrkleikum sínum og geti byggt framtíð sína og betra líf á þeim.

Innihald

Aðaláherslan er á fjóra þætti: Sjálfsmynd, samskipti, kynverund og andlega heilsu. Innan þessara þátta eru undirflokkar þar sem farið er ítarlega í atriði sem eru mikilvæg til að auka lífsgæði og kynntar nýjar aðferðir sem stuðla að þeim. Spurt er hvað kom fyrir konurnar í stað þess að spyrja hvað sé að þeim, hvernig þær komust af og til hvaða bjargráða greip hver og ein þeirra.

Samþykktir fyrir námskeið og hópa Rótarinnar gilda á námskeiðinu eins og í öðru starfi félagsins.

Hvenær?

Hópurinn hittist 10 sinnum, 8 sinnum á miðvikudögum og tvisvar á mánudögum, í Bjarkarhlíð við Bústaðaveg, í fyrsta sinn 30. september og síðasti tíminn er 25. nóvember 2020. Allir tímarnir hefjast stundvíslega kl. 17:15 og lýkur yfirleitt kl. 18:45 og aldrei seinna en upp úr kl. 19:00.

Skráningu í hópinn lýkur 23. september og þátttökugjald er 36.000 kr.

Þátttakendur eru hvattir til að sækja fundi í Rótarhópnum á miðvikudögum kl. 19.15 að námskeiðinu loknu.

Dagsetningar

Tími Dagsetning Tími Dagsetning
1 30. september 6 4. nóvember
2 7. október 7 11. nóvember
3 12. október 8 18. nóvember
4 14. október 9 23. nóvember
5 28. október 10 25. nóvember

Leiðbeinendur og verkefnisstjórn

Katrín, Kristín og Guðrún Ebba

Leiðbeinendur á námskeiðinu eru Guðrún Ebba Ólafsdóttir og Katrín G. Alfreðsdóttir. Verkefnisstjóri er Kristín I. Pálsdóttir.

 

Forvarnir í grunnskólum, áskoranir og leiðir

Forvarnir í grunnskólum, áskoranir og leiðir

Rótin, félag um konur, áföll og vímugjafa heldur námskeið um forvarnir í grunnskólum, áskoranir og leiðir miðvikudaginn 2. september 2020 kl. 13.30-16.00 í sal Laugalækjarskóla. Námskeiðið hlaut styrk úr Endurmenntunarsjóði grunnskóla og er því niðurgreitt. Þátttökugjald er 2.000 kr. og innifalið í því er verkefnahefti sem allir þátttakendur fá.

Einnig er hægt að fá námskeiðið í einstaka skóla eða svæði.

Sjá einnig á vef Rótarinnar þar sem skráning fer fram og þessari færslu er hægt að deila af Facebook.

Námskeið Rótarinnar byggist á gagnreyndri þekkingu á forvörnum. Á námskeiðinu verður meðal annars fjallað um börn og unglinga í áhættuhópum og áhrifaþætti vímuefnanotkunar eins og þeir birtast t.d. rannsóknum á erfiðri lífsreynslu í æsku og tengsl við vímuefnanotkun (ACE-listinn). Unnið er út frá því að vímuefnanotkun sé ekki einangrað vandamál heldur eigi sér m.a. rætur í áföllum. Þá er einnig fjallað um kynjavinkilinn á fíkniferlinum. Kynnt verða líkön um skipulag forvarna, eins og íslenska módelið, og skoðað hvað virkar og hvað ekki í forvörnum (European Prevention Curriculum). Einnig verður fjallað um verndandi þætti sem styðja gegn áhættuhegðun og vímuefnanotkun með sérstakri áherslu á hlut skóla í því sambandi.

Markmiðið með námskeiðinu er að styðja og styrkja starfsfólk skóla í að vinna að forvörnum í samræmi við nýjustu gagnreynda þekkingu og auka þekkingu á aðferðum sem styðja við betri líðan barna í skólunum. (more…)

Áföll – Leiðir til bata

Áföll – Leiðir til bata

Námskeiðinu er ætlað að styðja konur við að vinna úr afleiðingum áfalla. Athyglinni er beint að þeim áföllum sem konur eru í mestri hættu á að verða fyrir eins og kynferðisofbeldi, ofbeldi í nánum samböndum og öðru ofbeldi á milli tengdra aðila. Kennd eru bjargráð sem nýtast við úrvinnslu áfalla almennt. Námskeiðið er kynjamiðað og byggt er á styrkleikanálgun. Það er þróað af dr. Stephanie Covington og heitir á ensku Healing Trauma. Þátttakendur fá veglegt verkefnahefti. Á milli tíma er verkefnavinna sem konurnar eru hvattar til að vinna svo að þær fái sem mest út úr námskeiðinu.

Skráning

Fyrir hverjar
Námskeiðið er fyrir konur sem glíma við afleiðingar áfalla. Námskeiðið hentar sérstakleg vel konum sem hafa orðið fyrir kynferðisofbeldi.

Markmið
Markmið námskeiðsins er að þátttakendur geti náð sér af afleiðingum áfalla, að þær finni fyrir þeim krafti sem býr innra með þeim og veiti hverri annarri m.a. stuðning til þess að létta á skömm og sektarkennd.

Aðferð
Námskeiðið skiptist í átta hluti þar sem m.a. er fjallað um vald og valdbeitingu, áfallaferlið, sjálfsumhyggju, ACE-spurningalistann, reiði og heilbrigð sambönd.

Samþykktir fyrir námskeið og hópa Rótarinnar gilda á námskeiðinu eins og í öðru starfi félagsins.

Skipulag
Námskeiðið er í 3 skipti í 5 tíma í senn, frá kl. 10:00-15:00, og verður haldið í Bjarkarhlíð við Bústaðaveg. Þátttakendur eru hvattir til að taka með sér nesti til að borða í hálftíma hléi og drykk á brúsa. Hámarksfjöldi er 6 þátttakendur á meðan taka þarf tillit til sóttvarnaráðstafana vegna Covid-19 en þeim er fylgt á námskeiðinu.

Verð
30.000 kr.

Dagsetningar  Helgarnámskeið 

Tími Dags.  Kl. 
1. 7. nóvember 10.00-15.00
2. 8. nóvember 10.00-15.00
3. 14. nóvember 10.00-15.00

Leiðbeinendur og verkefnisstjórn
Leiðbeinendur eru Guðrún Ebba Ólafsdóttir og Katrín G. Alfreðsdóttir. Verkefnisstjóri er Kristín I. Pálsdóttir. Sjá nánar.

Þátttakendur eru hvattir til að sækja fundi í Rótarhópnum, á miðvikudögum kl. 19.15, að loknu námskeiðinu.

Þú ert ekki ein – við erum margar

Þú ert ekki ein – við erum margar

Rótin býður upp á námskeið fyrir konur um fjölskylduslit. Námskeiðið er byggt á kenningum um samkennd og sjálfsumhyggju.

Námskeiðið er fyrir konur sem upplifað hafa fjölskylduslit. Ástæður fjölskylduslita geta verið margar, til dæmis í kjölfar þess að konur hafa opnað umræðu um ofbeldi í skjóli fjölskyldu, hvort heldur er í kjölfar sifjaspells, kynferðisofbeldis, líkamlegs eða andlegs ofbeldis.

Skráningu lýkur 20. nóvember.

Markmið
Markmið námskeiðsins er að þátttakendur öðlist betri þekkingu og skilning á aðstæðum sínum og að konur sem hafa upplifað fjölskylduslit finni fyrir kraftinum sem býr innra með þeim og stuðningi hver frá annarri, til þess að m.a. að létta á skömm og sektarkennd.

Aðferð
Námskeiðið byggist annars vegar á fræðilegum kenningum og rannsóknum og hins vegar á reynslu þátttakenda í ljósi fræðanna. Styrkleikar þátttakenda eru kortlagðir og við deilum reynslu okkar, styrk og seiglu. Rætt verður um afleiðingar þess að hafa orðið fyrir ofbeldi í skjóli fjölskyldu og þeirra sem við treystum, skömm og sektarkennd og hvaða áhrif það hefur að upplifa höfnun af hendi fjölskyldumeðlima. Þá er fjallað um fyrirgefningarhugtakið en stundum er krafan um fyrirgefningu notuð til að stjórna þolendum. Að lokum er fjallað um leiðina til bata að tilgangsríku lífi í sátt við okkur sjálfar. Á milli tíma er verkefnavinna sem konurnar eru hvattar til að vinna svo að þær fái sem mest út úr námskeiðunum. Þátttakendur fá veglegt verkefnahefti.

Samþykktir fyrir námskeið og hópa Rótarinnar gilda á námskeiðinu eins og í öðru starfi félagsins.

Skipulag
Námskeiðið er haldið helgina 28.-29. nóvember, kl.10-14.30 báða dagana, og laugardaginn 9. janúar kl. 10.00-12.00.

Verð
30.000 kr.

Leiðbeinendur og verkefnisstjórn
Leiðbeinendur eru Guðrún Ebba Ólafsdóttir og Katrín G. Alfreðsdóttir. Verkefnisstjóri er Kristín I. Pálsdóttir. Sjá nánar