Fíkn sem afleiðing af ofbeldi – Fréttatilkynning

Vetrarstarf Rótarinnar – félags um málefni kvenna með áfengis- og fíknivanda – hefst formlega með umræðukvöldi miðvikudaginn 11. september kl. 20 í Kvennaheimilinu að Hallveigarstöðum, Túngötu 14, Reykjavík. Í haust verðum við með umræðukvöld annan og fjórða miðvikudag hvers mánaðar, nema í desember, þá verðum við með aðventukvöld 11. desember og förum svo í jólafrí. Umræðukvöldin eru öllum opin, bæði konum og körlum.

Fyrsti gestur haustsins er Sigrún Sigurðardóttir hjúkrunarfræðingur og lektor við Háskólann á Akureyri en Sigrún er doktorsnemi í lýðheilsuvísindum. Erindi hennar fjallar um fíkn sem afleiðingu af ofbeldi og annars konar áföllum í æsku.

Rannsóknir Sigrúnar snúast um að skoða afleiðingar ofbeldis í æsku fyrir heilsufar og líðan karla og kvenna og vinna að þróun þverfaglegra meðferðarúrræða fyrir þann hóp. Úrræðið sem Sigrún hefur unnið að er kallað Gæfusporin og hefur hún unnið með það úrræði á Akureyri undanfarin tvö haust og nú í haust verður farið af stað í þriðja sinn. Einnig er verið að fara að stað með Gæfusporin í Mjóddinni Í Reykjavík í september þar sem Sigrún verður með handleiðslu og fræðslu

Viðburðurinn er á Facebook: https://www.facebook.com/events/388545704608550/.

Dagskrá Rótarinnar fram að jólum er á þessa leið:

• 11. september – Fíkn sem afleiðing af ofbeldi og annars konar áföllum í æsku. Sigrún Sigurðardóttir hjúkrunarfræðingur og lektor við Háskólann á Akureyri en Sigrún er doktorsnemi í lýðheilsuvísindum.
• 25. september – Ungar mæður og fíknivandi. Anna María Jónsdóttir geðlæknir á geðsviði Landspítala og hjá Miðstöð foreldra og barna.
• 9. október – Meðferð við fíkn. Helga Sif Friðjónsdóttir Ph.D. í hjúkrunarfræði. Hjúkrunardeildarstjóri á fíknigeðdeild á geðsviði Landspítala.
• 23. október – Konur, fíkn og sektartilfinning. Sigríður Guðmarsdóttir, Ph.D. í guðfræði og sóknarprestur í Reykjavík
• 13. nóvember – Áfengið, ofbeldið og hitt kynið. Hildigunnur Ólafsdóttir afbrotafræðingur er dr. philos. frá Háskólanum í Osló.
• 27. nóvember – Tilfinningaleg vandamál kvenna í áfengismeðferð. Ása Guðmundsdóttir sérfræðingur í klínískri sálfræði. Ása hefur m.a. sérhæft sig í áfengis- og vímuefnavanda.
• 11. desember – Aðventukvöld Rótarinnar. Dagskrá kynnt síðar.

Sjá nánar á heimasíðu Rótarinnar.