Rótin býður upp á leiddan sjálfshjálparhóp, Rótarhóp, fyrir konur sem tekið hafa þátt í námskeiðum á vegum Rótarinnar. Konur sem eru komnar vel af stað í bata með öðrum leiðum eru einnig velkomnar í Rótarhópinn. Hópastarfið er konunum að kostnaðarlausu en samskotum er safnað. Hóparnir funda á miðvikudögum kl. 19.15-20.15 í Bjarkarhlíð við Bústaðaveg. 

Fyrsti fundur haustsins verður miðvikudagurinn 28. ágúst kl. 19.15-20.15.

Í Rótarhópunum er unnið út frá þekkingu á sambandi áfalla og vímuefnavanda og er þátttaka í hópunum aðeins einn hluti af áframhaldandi bataferli. Engin skyndilækning er til á áhrifum áfalla og allt lífið erum við að skoða fortíð okkar, læra af henni og skapa okkur betri framtíð.

Umræðuefni hópanna tengjast viðfangsefnum námskeiðsins Konur studdar til bata, og annarra námskeiða á vegum félagsins, þar sem aðaláherslan er á fjóra þætti, sem eru: sjálfsmyndsambönd og samskiptikynverund og andleg heilsa. Innan þessara þátta eru undirflokkar sem allir snerta mikilvæg atriði fyrir konur í bataferli. Spurt er hvað kom fyrir konurnar í stað þess að spyrja hvað sé að þeim. Hvernig hafa þær komist af og til hvaða bjargráða hver og ein þeirra hafi gripið. Rætt er um nýjar aðferðir til að takast á við vandann í stað neyslu.

Leiðbeinendur og verkefnisstjórn 

Leiðbeinendur í Rótarhópnum eru Guuðrún Ebba Ólafsdóttir og Katrín G. Alfreðsdóttir. Verkefnisstjóri er Kristín I. Pálsdóttir. Sjá nánar.

Skráning fer fram á síðu Rótarinnar

Eftirfarandi reglur gilda í hópunum:

Trúnaður 

Þeim persónulegu upplýsingum sem deilt er innan hópsins má ekki deila utan hans. Við verðum að vera vissar um að það ríki trúnaður innan hópsins. Það er ein undantekning frá þessu, leiðbeinendur verða að tilkynna það til réttra aðila ef fram koma upplýsingar um að öryggi einhvers sé í hættu.

Öryggi
Mikilvægt er að hver og ein upplifi öryggi. Til að tryggja öryggi beitum við hvorki andlegu né líkamlegu ofbeldi. Ekki er í boði að tala dónalega eða niðrandi við aðra.

Þátttaka
Allar konur þurfa að fá að taka þátt í umræðunum. Ekki er hjálplegt ef einhverjar verða ráðandi í umræðunum og aðrar sitja hljóðar. Vinsamlegast deilið öllum athugasemdum með öllum. Athugasemdir ykkar, spurningar og álit eiga erindi til okkar allra. Það getur bæði truflað og valdið sundrungu ef tvær og tvær eru að tala saman. Ef það kemur upp spurning um ákveðið efni sem einhver treystir sér ekki til að tala um má hún segja „PASS“.

Virðing
Þegar þið segið frá skoðun ykkar, vinsamlegast gerið það með virðingu fyrir hinum. Þá má ekki gagnrýna, dæma eða tala niður til nokkurs. Vinsamlegast grípið ekki fram í fyrir þeirri sem er að tala. Ef einhver ætlar að taka yfir umræðuna munu leiðbeinendur grípa inn í svo allar fái tækifæri til að tala. Það getur verið að einhverri líði illa, finni fyrir reiði og vilji ekki taka þátt í umræðunni en hluti af virðingu fyrir hópnum að trufla hann ekki með slæmri framkomu.

Stundvísi
Við byrjum á réttum tíma og við endum á réttum tíma.

Share This