Kynningarfundur – Haust 2019

Kynningarfundur – Haust 2019

Starf Rótarinnar á haustmisseri 2019 verður kynnt miðvikudaginn 21. ágúst kl. 20 að Hallveigarstöðum.
Félagið býður upp á fimm mismunandi námskeið í haust ásamt Rótarhópnum og umræðukvöldum. Námskeiðin „Konur studdar til bata“ og „Þú ert ekki ein, við erum margar“, sem einnig voru haldin síðasta vetur, eru aftur á dagskrá ásamt þremur nýjum námskeiðum. Tvö þeirra eru úr smiðju dr. Stephanie Covington, eins og „Konur studdar til bata“, en það eru námskeiðin „Áföll – Leiðir til bata“, sem er helgarnámskeið, og „Sjálfsuppgötvun og valdefling“ sem er sérsniðið að stúlkum og yngri konum, 18-25 ára. Þriðja nýja námskeiðið er svo  „Að segja frá“ sem er stutt námskeið fyrir konur sem íhuga að segja frá ofbeldi sem þær hafa orðið fyrir. Sjá nánar um dagskrána og hér er skráningarsíða.
Athugið að eftir kynningu á dagskránni, um kl. 20.45, mun lögmaður fjalla um sjúkragagnamál SÁÁ og ræða spurningar sem brenna á konum varðandi sjúkragögn þeirra sem hafa verið í meðferð á Vík. Sjá nánar.
Allar sem áhuga hafa á starfi Rótarinnar eru hvattar til að mæta og taka vinkonur sínar með!
Viðburðurinn er á Facebook!
Umræðukvöld Rótarinnar eru öllum opin, boðið er upp á te og kaffi sem er fjármagnað með samskotum. Munið eftir klinkinu eða leggið inn á reikning Rótarinnar: Kt. 500513-0470, bankanr. 0101 -26-011472.
Umræðukvöldið er haldið í Kvennaheimilinu, Hallveigarstöðum, Túngötu 14.

Óásættanleg meðferð á sjúkragögnum og lítilsvirðing við viðkvæman hóp

Óásættanleg meðferð á sjúkragögnum og lítilsvirðing við viðkvæman hóp

„Sjúkragögn frá SÁÁ sögð hafa farið á flakk“ var fyrirsögn fréttar sem birtist á Mbl.is hinn 23. júlí s.l. og eins og hún gefur til kynna fjallar fréttin um óvarlega og ólöglega meðferð sjúkragagna fólks sem þegið hefur meðferð á meðferðarstöð SÁÁ að Vík á Kjalarnesi.
Í fréttinni er vitnað í Arnþór Jónsson, formann SÁÁ s.l. 6 ár, og Hjalta Björnsson, sem starfaði sem dagskrárstjóri hjá samtökunum í áratugi, þar sem þeir vísa ábyrgð á ferðalagi þessara viðkvæmu sjúkragagna hvor á annan. Það þarf hins vegar ekkert að rífast um það hver ber ábyrgð á þessum gögnum því að það er skilgreint í 12. gr. laga nr. 55 um sjúkraskrár frá árinu 2009 að ábyrgðaraðili sjúkraskráa er „Heilbrigðisstofnun eða starfsstofa heilbrigðisstarfsmanna þar sem sjúkraskrár eru færðar“ og í reglugerð um sjúkraskrár segir:
„Ábyrgðaraðili sjúkraskráa hverrar stofnunar og starfsstofu heilbrigðisstarfsmanna skal sjá til þess að þar sé rekið öryggiskerfi sem tryggir vernd sjúkraskrárupplýsinga sem að lágmarki uppfylli fyrirmæli landlæknis um öryggi og gæði sjúkraskráa“, því er ljóst að SÁÁ ber því ábyrgð á þessum gögnum og Embætti landlæknis „skal hafa reglubundið eftirlit með því að heilbrigðisþjónusta sem veitt er hér á landi uppfylli faglegar kröfur og ákvæði heilbrigðislöggjafar á hverjum tíma.“ (more…)

Dagskrá Rótarinnar í haust

Dagskrá Rótarinnar í haust

Starf Rótarinnar á haustmisseri 2019 er nú skipulagt og býður félagið upp á þrjú ný námskeið og og aftur verða í boði námskeiðin Konur studdar til bata og Þú ert ekki ein, við erum margar sem einnig voru haldin síðasta vetur. Þá heldur Rótarhópur áfram og umræðukvöldin verða á sínum stað. Námskeiðin eru haldin í Bjarkarhlíð nema að annað sé tekið fram.

Skráning á námskeiðin er hér og í Rótarhóp hér

PDF-skjal með upplýsingum um starf Rótarinnar haustið 2019.

Konur studdar til bata

Námskeiðið Konur studdar til bata er námskeið fyrir konur þar sem lögð er áhersla á að vinna með rætur vímuefnavanda og annað andstreymi í lífi kvenna. Unnið er út frá því að vímuefnanotkun sé ekki einangrað vandamál heldur eigi sér m.a. rætur í áföllum og tekið er á þeim fjölþætta vanda sem konur með sögu um vímuefnavanda standa frammi fyrir.
Fyrir hverjar: Námskeiðið er ætlað konum sem eiga sögu um vímuefnavanda.
Markmið: Markmið námskeiðsins er að konur öðlist aukna sjálfsþekkingu sem einstaklingar en skilgreini sig ekki í gegnum sambönd eða stöðu sína. Einnig að þær átti sig á styrkleikum sínum og geti byggt framtíð sína og betra líf á þeim.
Sjá nánar.

Áföll – Leiðir til bata

Námskeiðinu er ætlað að hjálpa konum að vinna úr afleiðingum áfalla á líf þeirra. Athyglinni er beint að þeim áföllum sem konur eru í mestri hættu á að verða fyrir eins og kynferðisofbeldi í æsku, nauðgunum, ofbeldi í nánum samböndum og öðru ofbeldi á milli tengdra aðila. Kennd eru bjargráð sem nýtast við úrvinnslu áfalla almennt. Námskeiðið er kynjamiðað og byggt er á styrkleikanálgun.
Fyrir hverjar: Námskeið er fyrir konur sem glíma við afleiðingar áfalla. Námskeiðið hentar sérstakleg vel konum sem hafa orðið fyrir kynferðisofbeldi.
Markmið: Markmið námskeiðsins er að þátttakendur geti náð sér af afleiðingum áfalla, að þær finni fyrir þeim krafti sem býr innra með þeim og veiti hverri annarri m.a. stuðning til þess að létta á skömm og sektarkennd.
Sjá nánar.

Sjálfsuppgötvun og valdefling – Námskeið fyrir stúlkur og ungar konur

Námskeiðinu er ætlað að hvetja stúlkur og ungar konur til að styrkja sjálfsmynd sína og að öðlast rödd. Unglingsárin eru tími mikilla uppgötvana, áskorana og þroska. Ýmislegt í okkar kynjuðu menningu gerir þessar áskoranir snúnar fyrir stúlkur og margar þeirra ná ekki að öðlast eigin rödd eða jákvæða sjálfsímynd á þessu mikilvæga þroskaskeiði.
Fyrir hverjar: Námskeiðið er sérstaklega ætlað stúlkum og ungum konum á aldrinum 18-25 ára
Markmið: Að hjálpa stúlkum/ungum konum að skilja stöðu sína og áhrif þess að vera kona í heimi þar sem kynjamisrétti er viðvarandi, að styðja þátttakendur í úrvinnslu áfalla og beina þeim inn á braut vaxtar eftir áföll  með kynjasjónarmið að leiðarljósi og að þátttakendur öðlist aukinn skilning á hvað sjálf er, á samböndum, heilbrigðu líferni og öðlist framtíðarsýn.
Sjá nánar.

Þú ert ekki ein, við erum margar

Ástæður fjölskylduslita geta verið margvíslegar. Til dæmis geta þau orðið í kjölfar þess að konur opna umræðu um ofbeldi í skjóli fjölskyldu, hvort heldur er í kjölfar sifjaspells, kynferðisofbeldis, líkamlegs eða andlegs ofbeldis. Fjölskylduslit geta orðið að frumkvæði þolenda eða vegna útilokunar.
Fyrir hverjar: Námskeiðið er fyrir konur sem hafa upplifað fjölskylduslit.
Markmið: Markmið námskeiðsins er að konur sem hafa upplifað fjölskylduslit finni fyrir þeim krafti sem býr innra með þeim og stuðningi hver frá annarri til þess, m. a., að létta á skömm og sektarkennd og að þátttakendur öðlist betri þekkingu og skilning á aðstæðum sínum.
Sjá nánar.

Að segja frá

Konur sem hafa orðið fyrir kynferðisofbeldi glíma oft við flóknar afleiðingar þess. Ein leið til valdeflingar og bata er að rjúfa þögnina sem oft ríkir um kynferðisbrot og hafa hátt! Það getur átt við að segja frá, t.d. innan fjölskyldu, vinum, samstarfsfólki, á samfélagsmiðlum eða opinberlega í fjölmiðlum. Á námskeiðinu er farið í gegnum hvernig best er að undirbúa það að rjúfa þögnina.
Fyrir hverjar: Námskeiðið er ætlað konum sem hafa hug á að opna umræðu um ofbeldi sem þær hafa orðið fyrir.
Markmið: Markmið námskeiðsins er að konur geti sagt frá ofbeldi sem þær hafa orðið fyrir og afleiðingum þess, eins og til dæmis fíkn og áfallastreitu, að þær finni fyrir þeim krafti sem býr innra með þeim og veiti hverri annarri stuðning til þess, m.a. að létta á skömm og sektarkennd og að gefa konum sem þess óska tækifæri til að undirbúa sig til að segja opinberlega frá á eigin forsendum.
Sjá nánar.

Rótarhópur

Rótin býður upp á sjálfshjálparhóp, Rótarhóp, fyrir konur sem tekið hafa þátt í námskeiðinu Konur studdar til bata og öðrum námskeiðum á vegum Rótarinnar. Konur sem eru komnar vel af stað í bata með öðrum leiðum eru einnig velkomnar í Rótarhópinn. Hópastarfið er konunum að kostnaðarlausu en samskotum er safnað.
Fyrsti fundur haustsins verður miðvikudagurinn 28. ágúst kl. 19.15-20.15.
Sjá nánar um Rótarhóp.

Umræðukvöld

Rótin stendur að umræðukvöldum þar sem fyrirlesari hefur framsögu um efni sem tengist viðfangsefnum félagsins.
Umræðukvöld eru haldin um það bil tvisvar að hausti og tvisvar að vor í Kvennaheimilinu að Hallveigarstöðum.
21. ágúst – Fyrsta umræðukvöldið verður kynningarfundur um námskeið og aðra dagskrá vetrarins.
Gabríela Bryndís Ernudóttir, sálfræðingur, verður fyrirlesari á öðru umræðukvöldi haustsins. Dagsetning og nánari upplýsingar koma síðar.
Lilja Steingrímsdóttir, hjúkrunarfræðingur og nemandi í Bodynamics-fræðum sem fjalla um sállíkamlega nálgun á afleiðingar áfalla. Dagsetning og nánari upplýsingar koma síðar.
Sjá nánar.

 

Nýtt merki félagsins

Nýtt merki félagsins

Rótin hefur látið vinna nýtt merki félagsins í samræmi við hugmyndafræði félagsins sem byggir á því að nálgast vímuefnavanda kvenna út frá styrkleika. Það voru þau Einar Gylfason og Unnur Valdís Kristjánsdóttir hjá leynivopninu sem sköpuðu hið nýja útlit félagsins og eru þeim færðar bestu þakkir fyrir vel leyst verkefni.

Afraksturinn má m.a. sjá hér:

Nýtt ráð, vararáð og ársskýrsla

Nýtt ráð, vararáð og ársskýrsla

Aðalfundur Rótarinnar haldinn fimmtudaginn 9. maí kl. 20 í Kvennaheimilinu á Hallveigarstöðum, Túngötu 14.  Kristín I. Pálsdóttir setti fundinn og Guðrún Ebba Ólafsdóttir var kosinn fundarstjóri og fundarritari. Árdís gjaldkeri fór yfir reikninga félagsins sem voru samþykktir einhljóða.

Þá var kosið í ráð félagsins og í ráðinu 2019-2020 sitja: Auður Önnu Magnúsdóttir, Árdís Þórðardóttir, Áslaug Kristjana Árnadóttir. Guðrún Ebba Ólafsdóttir, Hrafnhildur Ólöf Ólafsdóttir, Hulda Stefanía Kristjánsdóttir, Katrín Alfreðsdóttir, Kristín Pálsdóttir, Þórlaug Sveinsdóttir, voru kosnar aðalfulltrúar. Björg Torfadóttir, Guðrún Erna Hreiðarsdóttir og Sólveig Þorleifsdóttir voru kosnar varafulltrúar. Þá var Dóróthea Lórenzdóttir kosin skoðunaraðili reikninga.

Að kosningu í embætti lokinni var starfsáætlun næsta árs kynnt og að loknum aðalfundarstörfum hélt Guðbrandur Árni Ísberg, sérfræðingur í klínískri sálfræði, erindi um skömmina sem góður rómur var gerður að.

Skýrslu ráðsins fyrir liðið ár, sem kynnt var á aðalfundi, má nálgast í PDF-skjali hér.

Rótin býður nýjar konur velkomnar í ráð og vararáð, þær Auði Önnu, Huldu Stefaníu, Björgu, Guðrúnu Ernu og Sólveigu, og þakkar þeim Guðrúnu Kristjánsdóttur og Eddu Arinbjarnar sem nú fóru úr vararáði fyrir samferðina frá stofnun félagsins. Þeim Helenu Bragadóttur, Margréti Gunnarsdóttur, Margréti Valdimarsdóttur og Soffíu Bæringsdóttur þökkum við fyrir störf í ráði og vararáði á liðnum árum. Allar fá þakkir fyrir uppbyggilega og góða samvist í ráðinu!